هنشــــــــــم ..عيد الربيــــع

الايام دى إحنا فى الربيع وبنحتفل بعيد الربيع أو بنسميه عيد شم النسيم

شم النسيم ده له جذور من زمااان فى التاريخ الفرعونى على وجه الخصوص يعنى حدوه البيض الملون والفسيخ والملانه والحواديت دى كلها مش من فراغ لاء ، دى حاجه اتعودنا عليها من الاجداد

يعنى من حوالى 5000سنه كدا يعنى بالتحديد الاسره الثالثه2700 ق.م .واطلقوا عليه عيد الشموس ثم حرف الاسم بمرور الزمن خاصه بالعصر القبطى إلى شم واضيفت إليه النسيم نسبه إلى الربيع وكان القدماء يحتفلون ب احتفال رسمى كبير فيما يعرف بأنقلاب الربيعى وهو اليوم الذى يتساوى فيه الليل و النهار وكانوا يجتمعون امام الواجهه الشماليه للهرم وقت الغروب حيث كان قرص الشمس يبدو وكانه يجلس فوق قمه الهرم .

يعنى مثلا أذكر من حكايات شم النسيم اللى أنا فاكرها ، دميه اللنبى

أيوه ودى حاجه مشهوره بيها مدينتى بورسعيدعلى وجهه الخصوص ، ليله شم النسيم كل واحد بيقعد يعمل دميه كدا من الملابس القديمه والحاجات اللى مش محتاجينها وتتحرق بالليل الساعه 12 ن طبعا ً حكايه الحريقه دى اتغلت من زماان عشان لها اخطار كتير

اللنبى ده يا جماعه - مش محمد سعد طبعاً _ لاء ده كان احد لوردات وحكام الاحتلال الانجليزى ، وكنوع من التهكم والسخريه من الاحتلال الانجليزى فى شكله اللورد اللنبى قام بقى اهل المدينه بعمل دميه على شكله وقاموا بحرقها كل سنه فى عيد شم النسيم لحد ما بقت الحكايه دى عاده تتوارثها الاجيال

ومش بس كدا لاء ده كمان بقيت بيتعمل لها معارض كل سنه فى شم النسيم كل سنه بتتناول عرض دمى اللنبى موضوع يمس حياه الشعب بالدرجه الاولى وبيظل المنظمون والموهوبون فى الفن الكاريكيتري يحضرول للمعرض ده من فتره طويله جدا قبل شم النسيم .

افتكر كمـــــان الفسيــــــــــخ - ده بقى مش محتاج كلام _ كلنا بناكل الفسيخ فى شم النسيم بس اكل الفسيخ إحتلف دلوقتى عن زماان يمكن مفيش فرق كبير فىالفسيخ نفسه اللى هوا السمك المملح لكن الفرق فى العادات

يعنى مثلا زماان الناس كانت بتخرج للمنتزهات والحدائق عشان تشم النسيم يعنى تشوف منظر زهور الربيع والهوا المنعش الل بيجدد فينا كل الذكريات الحلوه دلوقتى الموضوع اتغير بقيت عشان تروح أى حديقه او منتزه لازم لازم تشم رائحه الفسيخ فى كل مكان بدل رائحه الزهور وعبيرها الممتع

ومش بس كدا لاء ، وكمان تشوف اكوام من البشر ناصبه خيام وقاعده مغطيه اللون الاخضرالجميل اللى بيريح العين كأنك فى خيم الايواء .

تعبنا نقول يا جماعه دى حديقه يعنى عشان نشم عبير الازهار ونشوف الاشجار واللون الاخضر الرائع مش عشان نقعدج نأكل الفسيخ ونملى الجو برائحه غير محبوبه بالمره ، نحتفل ماشى ونفرح وكمان نغير جو بعيد عن ضغوط الحياه الكتير جدا ً بس برضه فى نفس الوقت لازم نحافظ على البيئه اللى احنا عايشين فيها عشالان اى حد يقدر يستعمل المكان ده بنفس الطريقه ونفس جودته وكفأته اللى انت استعملته بيها

أه ...كمان فى حاجه مهمه جدا ً نسيت احكى لكم عليها .

المانجؤؤنه

يمكن تقولوا لى ايه المانجؤؤنه دى ، هقولكم دى احد انواع المعجنات اللى بتتعمل احتفالا بشم النسيم مخصوص

ودى صوره بسيطه ليها اتفضلوا بالهنا والشفـــا

وأكــــــــتر حاجه مهمه بقى بالنسبه لى هيــــــا

البيض الملــــــــون

زماان وانا صغيره كنت بحب اوى أقعد ألون البيض احمر واخضر و اصفر واحمر

مكنتش عارفه هوا إزاى ماما بتخلى البيضه اللى لونها ابيض دى لونها اجمر كدا وجميل وكنت اقعد اتفرحج عليها لحد ما كبرت شويه صغننه واتعلمت أزاى الون البيض بالالوان الشمع والفلومستر والخشب

وبعديييين لما كبرت شويه كمان قالوا لى إن الالوان غلط ومضره بالصحه ف بقيت الون بألوان طبيعيه يعنى مثلا:

ألون بمغلى الكركديه عشان أخد لون احمر

ومغلى الشاى عشان اللون البنى الفاتح

ومغلى ورق البصل عشان اخد اللون الاصفر

وهكذا .....

ودلوقتــــى لا املك سوى ذكرياتى هذا لاحكيها لكم وأنتظر منكم ان تشاركونى حكيات شم النسيم و ذكرياتكم مع هذا اليوم الرائع

أه وكمان لا تنسوا اكل الفسيخ ... وكمان تلوين البيض