كل دى حاجات لازم نسأل نفسنا عن قبل ما نروح ننتخب حد لان صوتنا ده امانه ، انا على فكره مش ببيع كلام وخلاص.
لاء ده واقع مادى ملموس ومش بلد واحد فقط لكن ..ده على مستوى بلاد و دول كتيره جداً لان المرشح ده هوا بيكون ممثل للناس اللى إنتخبته وبتمثل شخصيتهم .
الحكايه بقى يا جماعه هيا غنى فجاه كدا إكتشفت غن نسبه كبيره جداً من الشباب اللى هما جيلى اصلا لا يمتلكون بطاقه إنتخابيه _ وبصراحه كدا ان كمان معدنيش بطاقه إنتخابيه _ طيب تعالوا نتناقش كدا ونعرف إيه السبب واللى عنده بطاقه إنتخابيه ده بيستعمل حقه فى إختيار من يمثله إزااااى أصل الموضوع طلع مش بسيط كدا لاء000
والله يعنى انا جيت أبص على اللى بيحصل فى لجان الانتخابات لقيتها مهزله بطل ما تحمل الكلمه من معانى أصوات مضروبه وفلوس علشان تعطى صوتك ....إلخ .
طيب لما المرشح الى هما عايزينه هوا كدا اللى هيكسب يبقى ان بقى اروع انتتخب لييييييييه بقــــــى ؟؟
لاء واجبى الوطنى بيقول وييحتم لازم روح اعطى صوتى لراجل يمثلنى ويعكس رغباتى فى المجلس الموقر ده ابسط حقوقى ، مش كدا برضــــه ؟؟
الحمايه بتنقسم قسمين : مرشحين ، مصوتون .
طيب تعالوا كدا نتكلم عن كل واحد فيهم ونبــــــــدأ ب ( الساده المرشحـــين )
الساده المرشحين دول بقى حكــــــايه مش هتخلص ولهم أنواع يعنى مثلا فكر كدا إنك تعمل جوله ميدانيه على الطبيعه لاحدى جلسات المجلس الموقر وشوف بنفسك الساده الاعضاء بيعملوا إيه..؟
هناك فى الركن الى على اليمين ده شويه من نواب الحزب الحاكم عاملين شله كدا على باقى أعضاء المجلس وهاتك يا دفاع عن الساده الوزراء والحكومه .
وفى الشمال كدا شويه رجاله قاعدين كل شويه يزعقوا ويعلوا فى صوتهم ويتخانقوا وبيقولوا عليهم أعضاء الجماعه المحظوره _ طيب لما هيا محظوره بتدخلوهم المجلس ليه ؟ _ إنتو بتضحكوا على مين بالظبط علينا ولا عليهم ولا على نفسكوا ولا هيا مصالح مشتركه تباح فى سبيلها اى حاجه وخلاص .
بص كدا ورا ركز اوى كدا على الراجل اللى هناك كدا هتلاقى من بعيد اللى يشوفه يقول إنه مـــــــركز اوى مع احداث الجلسه لأكن هوا فى الحقيقه نـــــايم ...أصل ام العيال كانت بتدق كفته طول الليل ومعرفش ينام _ معذور برضه الراجل _ هيعمل إيه يعنى .
شوف انت بقى الشويه دول إللى قاعدين يقزقزوا لـــــب كأنهم مش منها من هناك ولا لهم فى الدور ولا فى الطحين ، لاء ..وكل شويه تلاقى رئيس المجلس كــــــــل شويه يقولك :
الوافق على طلب العضو عبد السميع اللميع يتفضل برفع يده _ موافقــــــــه
وتلاقيهم أصلا مش عارفين هما بيرفعوا إيدهم ليـــــــــه !!
وكل كــــــام جلسه بقى تلاقى إستجواب لسياده الوزير فلان الفلانى وتانى جلسه الوزير العلانى ورئيس منظمه مش عارف مين ....
وتيجىالساده المسئولين عشان الاستجواب - ده لو حضروا الاستجواب ومتحججوش بمشاغل الوزاره طبعا - تلاقى نواب المجلس الموقر كله ملفوفين حواليه عشان خاطر يااخدوا منه توقيعات على طلبات أبناء الدايره بتاعتهم بلوشى كدا من غير ولا مليم ، مع إن تلاقى نائب فيه اخدله الشئ الفلانى عشان خاطر يجيب للحج احمد شقه ، ويشغل إبن الحج اسماعيل ..
لاء وكمــــــان فى نــــــوع تـــــانى بقى من الساده النواب تلاقيه داخل المجلس اصلا علشان خاطره امتيازات المجلس يعنى الفلوس والحصانه واللذى منه بقــــــى ، وشويه تسمع عن أن فلان الفلانى شركته محتكره سلع حيويه فى البلد ويرتفع سعرها كل يوم لحد ما الناس خلاص هتاكل قـــــــش وتعيش فى العراء
ماأصل محدش يقدر يكلمه سياده النائب عشـــــــان مسنـــــــــوووووووووود ..!
وحضره النائب ده بقى حكايته حكـــــايه الافندى متهرب من أداء الواجب الوطنى_ الخدمه العسكريه _ طيب لما انت هربات من واجب البلد عايز تدخل المجلــــــس ليه بقــــــــــى ..!
والبيه النايب معهوش الابتدائيه .... بيفك الخط بالعافيه يعنى عايز حد يساعده اصلا .
وأما بقى العضو المحترم ده ماشاء الله عليه بيستعمل المال والنفوذ والسلطه وشغال عشماوى بيحكم بالاعدام على خلق الله واللى يشوفه يقول مــــــلاك يا خواتـــــــى.
ده حــــــــاجه بسيطـــه كدا من اللى بيحصل داخل المجلس الموقر مجلس الشعب ـ لكن بقى اللى بيحصــل عشان الدخول للمجلس اصلا دى حدوته تانيه خالـــــــص الكلام فيها مش بيخلص أبداً .
زتكلفه إيه يعنى ولا حاجه شويع ناس غلابه بيضحوا عليهم ويعطوهم ورقه بعشوه ولاعشرين ومفيش مانع لووصلت لخمسين جنيه ..كله يهون فى سبيل عيون المجلس .
بس اللى محيرنى بقى أيه اللى يضمنه أن الناس دى هتدخل تعطيه صوتها بعد كدا ، ما محدش شايف حاجه هوا يعنى هيدخل مع كل واحد عشان يتأكد أنه هيعطيه صوته .
عشان خاطر يدخل ينتخبه ويعطيه صوته ، لا واللى قبض يتعلم عشان ميرجعش يقبض تانى ..يا ســــــلام على حقوق الانسان والمعامله الراقيه من النايب لابناء دايرته
والاكاده بقى إن سياده النائب بقى بعد ما ينجح أدى دقنى لو شفنا وشه تانى بعد ماينجح يطلع يا اخى العمره ما يرجعش غير على معاد الدوره الانتخابيه الجديده .
مش بنستفاد منه غير بأنه بس بيبقى موسم للساده تجار القماش والخطاطين على كام نتيجه عليها صوره النائب المحترم ـ تقولش خلاص من حبنا ليه بقى هنجط صورته طول السنه على نتيجه فى قلب البيت ـ وكام قلم هديه منه على كيلو لحمه واتنين كيلو ارز وكيس مرونه وإدعو لسعادته ربنا يخرب بيته ...أقصد ربنا يخليه ويعمر بيته .
أما الساده أبنا الدايـــره ودول القسم التانى والمهم جداَ من العمليه الانتخابيه
ودول بقى نصهم مش مطلع بطاقه إنتخابيه لانه شايف ان صوته مش هيغير فى الوضع حاجه ولو الانتخابات تتمتع بالشفافيه والنزاهه فالواحد بصرتاحه بقى مش ضامن المرشح بتاعه ومش واثق فى ولا ضامن انه مجرد ما ينجح مش هيتحول وادى وش الضيف يطلع العمره زى ما قلنا .
الناس بقى اللى معاها بطاقه إنتخابيه نصهم بيروحوا يعطوا صوتهم للنائب اللى بيعطيهم فلوس ، تلاقيهم ولقفين طابووور ولا طابور العيش اقبض واعطى صوتك للمرشح ويتعلم عليه بختم عشان ميرجعش ياخد فلوس تانى
جوا اللجنه بقى والله بيكون فى ناس مخلصه وتعطى صوتها للنائب اللى أخدت فلوسه ، وناس تانيه بقى تدخل تعطى صوتها للنائب اللى شايفاه يستحق .
أما الباقين ف دول القله اللى لسه عارفه ومتاكده ان صوتها امانه وإنها لازم تتحمل مسئوليه أختيارها لمرشح معين هيمثلها وينقل رغباتها للساده المسئولين .
ودول بقى اللى الامل فيهم يغيروا الواقع المحززن والمسئ فى الواقع المصرى .
يعنى كدا فى النهايه يا جماعه كلنا متهمين أحنا كشعب جزء كبير منا خلاص يأس وفقد الامل فى غن الاحوال تتصلح وخلاص نفض دماغه من كل اللى بيحصل ، وده مش مطلوب فى ظروف زى اللى البلد بتمر بيها .
أما الساده ممثلىالشعب ف بقولهم بس زى ما بتفكروا فى مصالح سعادتكو ف يا رييييييت تتذكروا غن لولا الشعب الغلبان ده اللى لما بيعطيك صوته بيكون جواه بيتمنى إنك تساعده على مصاعب الحياه مكنتش هتنجح وتقعد تحت القبه أبداً
ففكر فى مصالحه لو حتىربع ما بتفكر فى مصالحك إنت لإن كتر الضغط ولد الانفجار والوضع مش هيدوم لك كدا على طول.
ليست هناك تعليقات:
إرسال تعليق